كونوا صادقين مع أنفسكم و صادقين في وعودكم لناخبيكم قبل أن تصدقوا الوفاء لاحزابكم

عسلامة،

اليوم و كيف شباب تونس الكل، كان شباب حزب "أفاق تونس" يتابع في أشغال المجلس التأسيسي إلي تسناتلو الفرصة باش يكون موجود بفضل "ثورة الشباب" كيف ما كانوا يقولولنا في الحملة الإنتخابية، و إلي التمثيل متاع الشباب فيه بعيد كل البعد على نسبة 65% إلي تمثل نسبة الشباب من جملة المواطنين إلي في سن الإنتخاب. نتابعو في الأشغال هاذي و كلنا أمل باش نشوفو إلي الناس إلي انتخبناهم عند وعدهم بالعمل على الخروج من المرحلة هاذي بأسرع وقت ممكن مع المحافظة على الجدية المطلقة في ذلك.

الشهر قريب يتسكر على تاريخ إنعقاد أول جلسة و الجو عال العال :

• نبداو بإحترام الهوية متاعنا و خصوصياتنا الحضارية في ما يخص أوقات العمل : كأي إدارة تونسية تحترم روحها، المجلس التأسيسي مليء بالمتأخرين في الإلتحاق بعملهم و في نهار كيف البارح، التأخير سجل حضورو صباحاً و مسائاً إلا في وقت الراحة إلي كانت تنجم تصير كارثة لوكان صار فيه تأخير لولا التذكير إلي صار في داخل المجلس و الحمد لله. هذاكة علاش حبينا نسوقو ملحوظة صغيرة لنوابنا المحترمين : "ثمة أكثر من 700000 معطل عن العمل مستعدين باش يخدموا بربع الشهرية إلي تاخذوا فيها مع إحترام وقت العمل و كان لزم من غير راحة"
• طرح المشاغل المستعجلة إلي من شأنها ترجع الروح لوضعية إجتماعية و إقتصادية "شبه كارثية"، و التقارير إلي خرجت من البنك المركزي و غيروا أكبر دليل على هذا، كقضية الحصانة إلي تخلينا نطرحو أكثر من سؤال حول المقصد من إستعجال القضية هاذي. تو النائب أو النائبة كيف يشدهم الرادار الألي و هوما مروحين، اش كان عليه لوكان خلصوا هاك ال60 دينار ؟ بعد هذا و دونو هوما معفيين من حق الايصنس (إلي للتذكير موش باش يفيقوا بيه غلا مرتين العام القادم) يحسبوا رواحهم يساهموا بقسط من المال في الخروج من الأزمة الإقتصادية إلي عايشتها بلادنا كيف ما وخيانهم العملة في القطاعين العام و الخاص إلي من نهار 2 في الشهر يتسلفو و إلي عملوا مسيرات في كل أنحاء البلاد باش الدولة تفكر في قصان 4 أيام عمل لإعانتها في محنتها.
• التركيز على جودة الأعمال من قبيل رفع الخبر في الجملة الإسمية و كان فضل شوية وقت و كملت كتابة الدستور، النواب الأفاضل باش يعملولنا درس في اللفيف المفروق و اللفيف المقرون و كيفية الإدغام و أي الساكنين يحذف عند الإلتقاء خاصةً و انو "الفقر" و "البطالة" الزوز سكنوا و لتو ما ريناش بوادر حلول ليهم.
•  المناقشات الحادة و الجريئة و الخالية من كل تملق من قبيل "الرابحين" و "الخاسرين" و تقول عليهم يحكيو على كأس تونس، موش "مستقبل تونس" و بالطبيعة الشعب هو إلي رصاتلو كيف الكورة بن الذكورة يتفرج في الناس إلي اختارهم باش يحددولو مصيرو و مصير صغارو يتعاملوا مع مداولات المجلس التأسيسي بعقلية "الأحد الرياضي" و لوكان نسيبوهم شوية تو إتدور فيها "ديرو معانا القيرة"
• الإنضباط الغير مسبوق كمبدأ شخصي لا حياد عنه حتى و إن كان على حساب مبادئٍ عامة أخرى كيف "الوفاء بالعهود و الوعود" و إلي علاوةً على كونو ركن أساسي للمصداقية، في القرأن الكريم تذكر في أكثر من موضع، بعد بإسم الله الرحمن الرحيم : 
• وَأَوْفُوا بِالْعَهْدِ إِنَّ الْعَهْدَ كَانَ مَسْئُولًا [الإسراء: 34]
• وَالَّذِينَ هُمْ لِأَمَانَاتِهِمْ وَعَهْدِهِمْ رَاعُونَ [المعارج: 32] [المؤمنون: 8]
• وَالْمُوفُونَ بِعَهْدِهِمْ إِذَا عَاهَدُوا وَالصَّابِرِينَ فِي الْبَأْسَاءِ وَالضَّرَّاءِ وَحِينَ الْبَأْسِ أُولَئِكَ الَّذِينَ صَدَقُوا وَأُولَئِكَ هُمُ الْمُتَّقُونَ [البقرة : 177]

أثناء الجلسة الصباحية لمداولات المجلس التأسيسي صوتت أحزاب النهضة و المؤتمر و التكتل ضد تحديد المدة الزمنية لأشغال المجلس التأسيسي و ذالك بنسبة تصويت مرتفعة بلغت 153 صوت ، هذا وقد أمضت كل الأحزاب المتواجدة بالمجلس التأسيسي باستثناء حزب المؤتمر من اجل الجمهورية في وقت سابق على وثيقة تعهدت فيها بالالتزام بمدة سنة كأقصى حد لأشغال المجلس التأسيسي. في عالم السياسة كيف نواب كتلة حزبية يصوتوا على عكس ما وعدو بيه في حملتهم الإنتخابية لأنو إستراتيجية حزبهم و تحالفاتهم تطلب منهم هذا، نقولو "هذا إنضباط حزبي". معقول و صواب إذا كنا في وضعية "برلمان" يصوت على استراتيجيات موش "مجلس تأسيسي" يصوت على دستور و قوانين باش تحدد مصير البلاد كيف مسألة المدة "الإنتقالية" الجديدة إلي تعتبر مرحلة من عدم الإستقرار مادام ما عندناش دستور واضح المعالم ينظم الأمور و المصالح بصفة قطعية و نهائية. كشباب تونسي أولاً و كشباب حزب "أفاق تونس" نستغربو كيفاش يوصل نائب حملوا الشعب مسؤلية تقرير مصيرو ينقض التعهد الأخلاقي إلي قام بيه في سبيل "طاعة أولي الأمر" في حزبو.

أحنا كشباب حزب "أفاق تونس" حبينا نتوجهو بنداء أو تذكير لنواب الشعب مهما كانت انتمائاتهم الحزبية : "كونوا صادقين مع أنفسكم و صادقين في وعودكم لناخبيكم قبل أن تصدقوا الوفاء لاحزابكم". يمكن صارت غلطة في النطق وقت صدر المرسوم الداعي للإنتخابات، أما راهو "مجلس تأسيسي" و ليس "مجلس تسييسي" و كيف ما يقولو جدودنا ربي يجريها على الصلاح

تحيا تونسنا

كيف طبال قرقنة، يكريوه بويبة و يسكتوه بقفيز

السلام عليكم

قبل كل شيء، عنوان التدوينة يذكرنا بجزر قرقنة المزيانة و إلي ينجمو يكونوا قطب سياحي بيئي و ايكولوجي كبير و زيد فوق هذا متساكنين من أطيب خلق الله و موروث ثقافي حلو برشة، من بينو طبال قرقنة المشهور. قرقنة عطات لتونس، بالخصوص، شخصيات ما نقدروش ننساوهم نهار، في كل المجالات من رياضيين كيف الهادي بالرخيصة الله يرحمو و مناضلين وطنيين كيف الشهيد "فرحات حشاد". قلنا مناضل وطني لأنو "فرحات حشاد" ماهوش ملك النقابيين أو السياسيين، فقط، بل هو ملك الشعب إلي كان يدافع على حقو في الحرية و الكرامة و الدليل انو أشهر قولة قالها الشهيد هي "أحبك يا شعب" قبل ما نفقدوه في نهار كيف اليوم تو 59 سنا بالضبط. الله يرحمو و يرحم جميع الشهداء.

يقول القائل علاش العنوان هذا ؟ الإجابة هي : هو التعبير المثالي، في الأمثال الشعبية التونسية، على مشروع تنظيم السلط العمومية إلي تم تقديمو للتصويت، غدوة، في الجلسة العامة للمجلس التأسيسي. مشروع يعطي صلوحيات مطلقة للحكومة، خاصةً في الحالات الخاصة كيف حالة الطوارئ إلي نعيشو فيها، و زيد فوق هذا يحميها من سحب الثقة بدرجة رهيبة. الملخص، حكومة ينتخبها المجلس ب50%+1 و ما ينحيها كان بالثلثين (و ناس بكري خلاوها مصفية : "يكريوه بويبة و يسكتوه بقفيز") مع عدم التنصيص على مدة إنتهاء صلوحية المجلس التأسيسي و الحكومة إلي انبثقت منو. كيف كيف عندنا كحزب "أفاق تونس" احتراز في ما يخص نظام المصادقة على القوانين إلي يتم بأغلبية بسيطة (50%+1) في وقت ما عندناش فيه حتى محكمة دستورية تنجم تراقب دستورية القوانين هاذي.

حزب "أفاق تونس" وعد المواطنين كونو باش يدافع على مشروع ديمقراطي يكفل التفريق بين السلط، القطع مع الإنفراد بالسلطة، المحاسبة لأي مسؤول و إمكانية ايقافو عن التمادي في سوء التصرف في أملاك أو مصالح المواطنين. حزب "أفاق تونس" رفض باش يكون في الحكومة و إختار "المعارضة البنائة" إلي بعض السياسيين اعتبروه "تنبير" تقول نحكيو على جمعيات رياضية في إطار بطولة موش على مجلس تأسيسي مكلف باش يكتب دستور و إلي يستوجب وجود معارضة قادرة باش تعطي الحلول البديلة في صورة ما إذا لقى روحو في أزمة كيف إلي نعيشو فيها اليوم. هذاكة علاش حزب "أفاق تونس" قرر باش يبين صحة موقفو، صدق وعودو و حسن نيتو بتقديم مقترحات بديلة عن بعض الفصول إلي خالقة أزمة في البلاد :
"
الفصل 2

الفصل 2 المتعلق بدور المجلس التأسيسي لا تحدد فترته الزمنية التي لا يجب ان تتجاوز السنة كما نص عليه القانون الانتخابي و الوثيقة التي صادق عليها 11 حزب قبل الانتخابات

رؤية آفاق تونس
نحن نرى أن المجلس التأسيسي هو الهيكل الوحيد ذو شرعية انتخابية لذلك هو صاحب القرار و له جميع الصلاحيات.و لكن إتباعا لقواعد الديمقراطية يجب أن تكون مدته الزمنية محددة اقتراحنا يتمثل في إدماج فترة المجلس التأسيسي، أي سنة، في قانونه الداخلي.و في صورة عدم تمكن المجلس من صياغة الدستور يتم تكوين لجنة خبراء للإشراف على هذه المهمة في أجل لا يتجاوز الشهرين.
لذلك يجب الاحتفاظ بالمادة114 والمادة115 من القانون الداخلي للمجلس التأسيسي المقترح من قبل النهضة و الذي يمهل اللجان المكلفة بصياغة الدستور 8 أسابيع لإنهاء أشغالها
"

"
الفصل4

المجلس التأسيسي يتمتع بالسلطة التشريعية أي كتابة قوانين الحكومة أو المجلس بنفسه.هذه القوانين سيتم عليها التصويت بالأغلبية المطلقة (50%+1) بالنسبة للقوانين التأسيسية التي تمس بتنظيم هياكل الدولة و بأغلبية الحاضرين بالنسبة للقوانين العادية في ما يخص العملية الديمقراطية،هذه القوانين المنتخبة تخضع إلى مراقبة دستورية من قبل محكمة أو مجلس دستوري. هذه المراقبة غير موجودة في تونس في الوقت الحالي

رؤية آفاق تونس
بما أنه لا يمكن مراجعة القوانين التأسيسية كقوانين تنظيم الأحزاب وقوانين الإعلام و تنظيم العدالة و بالأخص القانون الانتخابي الذي سينظم العملية الانتخابية المقبلة وسيكون له تأثير كبير في الصورة السياسية المستقبلية للبلاد ، من قبل محكمة أو مجلس دستوري،يجب التصويت عليها بأغلبية الثلثين
"

"
الفصل7

عندما يتعلق الأمر بتنظيم السلط العمومية من الطبيعي التخمين في حالات الطوارئ
قد تم نقاش و تحسين هذا الفصل بالمقارنة بالنسخة الأولى لتنظيم السلط الذي يسلم السلطة التشريعية بالتوازي إلى رئيس الحكومة و إلى رئيس المجلس التأسيسي وإلى الوزير الأول في حالة الطوارئ. لكن هذا الفصل لا يحدد مدة تواصل حالة الطوارئ.كما يعلم الجميع هنالك حالات طوارئ لا نهاية لها

رؤية آفاق تونس
لإعلان حالة الطوارئ يجب الرجوع إلى مبدأ سيراكوزا المعروف لدى جميع الدستووريين. يمكن للمجلس التأسيسي،بعد إتفاق الثلثين،إعطاء سلطته إلى رئيس الدولة و إلى رئيس المجلس التأسيسي و إلى الوزير الأول لمدة لا تتجاوز الأربعين يوما عند إنتهاء هذه المدة، يجتمع المجلس التأسيسي و يلقي كل من المسؤولين المذكورين سابقه بكلمة تلم بحالة البلاد يتم بعدها إن إقتضى الأمر بتمديد حالة الطوارئ
"

"
الفصل 18

الفصل 18 أنه يتم حجب الثقة من الحكومة بتصويت أغلبية الثلثين في حين أن هذه الحكومة إكتسبت ثقة المجلس بالأغلبية المطلقة (50%+1) هذا لا يتماشى مع أسس الديمقراطية لأنه حتى في صورةتفكك التحالف المتكون من هذه الأحزاب لا يمكن إسقاط الحكومة
الحجة التي تعتمد على إستقرارية الحكومة هي حجة متحيزة لأن الحكومة التي لا تتمتع بثقة الأغلبية البرلمانية لتحكم و لتمرير القوانين لا يمكن لها أن تسير البلاد

رؤية آفاق تونس
لتأمين الإستقرارية السياسية و تواصل الحكومة يقترح آفاق تونس إعتماد حجب الثقة البناءة الذي يصوت عليه بالأغلبية المطلقة من قبل المجلس التأسيسي
في بعض الحالات يتم إسقاط الحكومة من قبل مجلس بآعتماد الأغلبية المطلقة لكن أفراد هذا المجلس يعجزون على تشكيل حكومة جديدة كما هو الحال الآن في بلجيكيا
حجب الثقة البناء يفرض على الأغلبية الجديدة تقديم حكومة لرئيس المجلس التأسيسي و يتقدم هذا الأخير بطلب إقتراع الثقة وإن تسنى له ذلك يتولى الرئيس فرضيا إدماج هذه الحكومة وبذلك يكون إقتراع الثقة هو بنفسه حجب الثقة من الحكومة الأولى
"

في النهاية و قبل ما نختمو التدوينة هاذي، نحبو نطلبو من إدارة التلفزة الوطنية باش في عوض ما الوطنية 2 تعدي نفس البرامج إلي في الوطنية 1 و في نفس الوقت، مذابينا لوكان يعديولنا أعمال المجلس التأسيسي (أو اللجان المنبثقة منو) في المباشر، خاصةً و انو الصدف شاءت أنهم يجتمعوا في الوقت هذاكة بالضبط. هذا يدخل في إطار الشفافية و تسخير الموارد العمومية في خدمة مطالب الشعب و شكراً.

عاشت الديمقراطية و تحيا تونسنا

الناخب هاززو الواد و النائب يقول الحكومة صابة

عسلامة،

يقول المثل الشعبي التونسي "العزوزة هاززها الواد و هي تقول العام صابة" و المثل هذا يلخص وضعية الحياة السياسية و الإجتماعية في تونس اليوم. يمكن الكلام هذا فيه برشة تشاؤم لكن هو نتيجة للشيء إلي قاعدين نشوفو فيه من نهار الأحد لليوم. كل يوم ثمة عائلات قاعدة تخرج من ديارها بعد ما إحتل الماء الفضاء إلي يحاولو يعيشوا فيه بسترة، على الأقل، في إنتظار الكرامة. في نفس الوقت المسؤولين السياسيين "غاطسين" في الصراعات حول مسألة الحكومة القادمة.

نهار الأحد، ربي عطا خيرو و في ضل بنية تحتية مهسهسة كيف النظام إلي كان سبب فيها، كانت النتيجة كارثة بما انو ثمة أرواح مشات ضحية و احنا كشباب حزب "أفاق تونس" و كبشر قبل كل شي، نؤمنو إلي الإنسان هو الأولوية و الأصل في بناء المجتمع و الدولة، نعتبرو كل حادث تمشي في جرتو أرواح، كارثة إنسانية. البارح زادة، منطقة مجاز الباب كانت و مازالت تغرق بعد ما واد مجردة فاض، ربي يستر تمشيش ضحايا اخرين يتزادو للحصيلة متاع نهار الأحد. المشكل إلي أكبر هو بما انو الناس هاذم عطاو اصواتهم و ربحوا عباد في كراسي للمجلس التأسيسي، فإنو، و كيف ما جرات العادة، ما عاد يتلفتلهم حد و لا يتذكرهم، يا حي للإنتخابات الجاية وقت إلي باش يجريو المترشحين بوعودهم و أحلامهم الوردية إلي يبعوهالهم. أولوية المسؤولين الجدد هي تشكيل الحكومة و صراعات الحسابات الشخصية و الحزبية إلي لا تزيد لا تنقص للسيد إلي دارو ما ينجم يدخللها كان بغواصة و موش عارف وين باش يبات من هنا لين يلقاولو حل لمشكلتو، هذا إذا خممو فيها من اصلو !

أولاً و قبل كل شيء، نحبو نذكرو المسؤولين الجدد، كشباب حزب "أفاق تونس"، إلي واحد من مطالب الشعب التونسي هي بث مداولات المجلس التأسيسي على المباشر في التلفزة و بما انو تشكيل الحكومة هو واحد من صلاحيات السلطة المؤسسة الجديدة، فيمكن إعتبار النقاشات إلي قاعدة تصير مداولات ما إحترمتش المطلب إلي ذكرناه و إلي يمثل وسيلة لضمان الشفافية إلي وعدتو بيها ناخبيكم. ثانياً، كان من المفروض و الواجب تبليغ رسالة تعاطف مع المنكوبين كأولوية لأنو في حالة أخرى باش يحسوا إلي مشروع القضاء على التهميش يمر بالقضاء على المهمشين ! و احنا كشباب حزب "أفاق تونس" نعلمو كل التوانسة إلي لحقهم ضرر إلي احنا ماناش ناسينهم و إلي حاسسين بيهم و إذا إنجمو نعملوا أي حاجة تنجم تخفف عليهم، باش يكونلنا فخر انو نساهمو بمجهودنا الكل و نعزيو كل شخص فقد قريب و إلا صديق أو حبيب في الفيضانات الأخيرة. ثالثاً، يلزم يتحل تحقيق في أسباب تطور الأوضاع بالشكل هذا و إذا ثبت انو الإهمال خاصةً على مستوى البنية الأساسية هو السبب، فيجب محاسبة المسؤولين و جعلهم عبرة للي باش يجي و يشد بلاصتهم. رابعاً، نتوجهو بالشكر و التقدير لكل شخص ساهم من قريب أو بعيد في مجهود الإغاثة من أعوان حماية مدنية، أمن، حرس، جيش، أطباء، مجتمع مدني، مواطنين، محطات الرصد الجوي، فرق مجابهة الكوارث ... انشالله ما نسينا حد منكم، لأنهم يقدموا في خدمة إنسانية عظيمة تساهم في إنقاذ أرواح.

في الختام، نتوجهو بنداء لكل مناضلي و مناضلات حزب "أفاق تونس" باش يكونوا مساهمين في المجهودات إلي قاعدة تصير من خلال التعاون و التنسيق مع الجمعيات أو المنظمات أو التحركات المدنية من غير إشهار و بالمحافظة على السرية لأنو حزب "أفاق تونس" يرفض باش يركب على أحداث اليمة كيف هاذي باش يلمع صورتوا. حزب "أفاق تونس" يحط المواطن في مقدمة أولوياتو و هذا ماهوش كلام نبيعو فيه في إطار حملة إنتخابية لكن مبدأ نؤمنو بيه.

تحيا تونسنا

ذكرى عيد جلاء الإستعمار و الدكتاتورية

عسلامة،

اليوم تونسنا تحتفل بذكرى عيد جلاء الإستعمار الفرنسي على تراب وطننا العزيز و لكن هذا ما يمنعش إلي تونسنا تعاني من إستعمار أكبر و أخطر إلي هو "الدكتاتورية" و نهار 23 أكتوبر 2011 باش تكونلنا فرصة لانجلاء فعلي للإنفراد بالحكم من طرف شخص واحد و حزب واحد. حزب "أفاق تونس" يستدعاكم باش تساهمو في تخلص تونس من "عهد العبودية" كيف ما ساهموا ابائنا و جدودنا في التخلص من "الحقبة الإستعمارية".

اليوم هو عيد ذكرى عظيمة عند كل التونسيين، في نهار كيف هذا تو 48 سنا التالي، كانت فرنسا مازالت مسيطرة عسكرياً على وطننا في وقت إلي تونس خذات استقلالها ليها أكثر من 7 سنين و حتى من الجزائر الشقيقة كانت استقلت منذ أكثر من عام. في الوقت هذاكة كانت تونس تتمتع بإستقلال إداري و المستعمر الفرنسي ما كانش عندو الحق باش يتدخل في دولة أعلنت في دستورها إلي هي "دولة ذات سيادة" لكن التوانسة ما كانوش يرضاو "بإستقلال مذرح" و كانوا يشوفوا إلي إستمرار وجود قاعدة عسكرية أجنبية على تراب بلادنا هو إنتهاك لسيادة و "هيبة الدولة" و بالتالي إنتهاك لسيادة و هيبة المواطنين (و العكس صحيح لأنو الدولة و المواطن هوما زوز مفاهيم ما يتجزؤوش على بعضهم). الحقيقة هي انو معركة الجلاء بدات في 19 جويلية 1961 و نتيجة للي ذكرناه سابقاً انطلقت معركة بين جيش فرنساوي مجهز بأحدث الأسلحة و التقنيات و توانسة يغيروا على بلادهم عطاو صدورهم للكرطوش و كانوا في بعض الأحيان عزل من السلاح. كل عام نتذكروهم و هذا موش من باب التكرار لكن من باب رد الجميل لشهداء ثورة من ثورات تونس. كانت النتيجة هي إستكمال إستقلال تونس من الإستعمار الفرنسي في 15 جويلية 1963 بحكم إتفاقية ثنائية. للتاريخ فإنو نهار 12 ماي 1964 صدر قرار تأميم أراضي المستعمرين و اعادتها تحت ملكية الدولة التونسية.

الذكرى هاذي ما تبعدش على واقع تونس اليوم. قبل 14 جانفي 2011 كنا عايشين تحت الظلم و الدكتاتورية و شكل من أشكال الإستعمار بكل ما فيه من تعذيب و تقتيل و عدم إحترام حق التونسيين في تقرير مصيرهم و ترهيب كل من ينادي بالحرية. نهار 17 ديسمبر 2010 انطلقت معركة جلاء الدكتاتورية، معركة سقطو فيها شهداء عزل من السلاح برصاص نظام مجرم، و نهار 14 جانفي 2011 خذينا شكل من أشكال الإستقلال من حكم مستبد قمعي. لكن استقلالنا يبقى منقوص و احساسنا بالحرية كيف كيف، مادامنا ما إستكملناش أخر و أهم خطوة نحو فرض إرادة الشعب، موش بالسلاح، عن طريق صندوق الإنتخاب (نخيرو كلمة إنتخاب على كلمة إقتراع لأنو كلمة إقتراع مشتقة من "القرعة" و هي عملية إختيار تخضع للحظ و الإنتخاب هو إختيار نابع من إرادة و إقتناع). نهار 23 أكتوبر 2011 هو نهار يكتمل فيه انجلاء الدكتاتورية و إذا نجحنا في تنظيم و القيام بإنتخابات حرة و شفافة و ديمقراطية فإنو باش يكون عيد ما يقلش أهمية على عيد الجلاء لأنو تواصل لمعركة بناء تونس الحديثة.

حزب "أفاق تونس" ما دخلش للإنتخابات هاذي و يديه فارغين، كيف ما انقولو، بل دخللها بمشروع دستور، مشروع واضح المعالم يحط الحريات و الحقوق في مقدمة إقتراحاتو و ما يقبلش حتى مساومة عليهم. ما جيناش بمجرد تصورات لتجنب عودة الدكتاتورية، لا، جبنا مقترحات عملية لنظام حكم يضمن قطع السبل قدام كل حزب أو شخص يمني روحو باش يكون بن علي أو تجمع دستوري جديد. حزب "أفاق تونس" ما قدمش مشروع الدستور مع تقديم البرنامج الإقتصادي و الإجتماعي لأنو يرفض باش يكون الدستور إلي باش يكتبوا المجلس التأسيسي مجرد جزئية في برنامج، لأنها هاذي مغالطة للناخبين، احنا نأكدو إلي الدستور هو الأصل في المجلس التأسيسي أهميتو بقدر أهمية باقي البرامج كان موش أكثر. إذا انتوما زادة تؤمنوا إلي أساس بناء دولة ديمقراطية يكون بالأساس و أولاً بضمان الحريات و الحقوق الأساسية و حمايتها، صوتو لحزب "أفاق تونس" نهار 23 أكتوبر 2011.

تحيا الحرية و تحيا تونسنا

دعوة للتعرف على برنامجنا، بل برنامجكم

عسلامة،

كيف ما تعرفوا الكل، حزب "أفاق تونس" قدم للصحفيين في الأسابيع الفارطة مشروع دستور و برنامج إقتصادي و إجتماعي و برشة منكم يمكن قراو المحتوى متاعهم على الأنترنات و إلا ملخصات في الصحف أو ما ذكرتو بعض وسائل الإعلام. برنامج حبينا نزيدو نوضحوه ليكم عن طريق شوية فيديوات تبسط بعض النقاط التقنية، خاصة فيما يتعلق بمشروع الدستور.

اليوم عندنا برنامج إقتصادي و إجتماعي كامل نحبو المواطنين يتعرفوا عليه باش يفهمو تصورنا لتونس الجديدة. برنامج يستحق باش نوضحوه بأكثر من فيديوات و إلا ملفات تنجمو تهبطوها مالأنترنات، من واجبنا باش نتنقلو لكل المناطق و الجهات و نجتمعو بيكم و نبينولكم إلي الملتقيات إلي نظمناها معاكم و التنقلات إلي قمنا بيها باش نسمعوا مشاكلكم و اقتراحاتكم ما كانتش مجرد دعاية سياسية. لا ! الخدمة إلي خدمناها ما كانتش تنجم تصير إذا ما حليتولناش دياركم و قلوبكم و قبلتو باش تحكيو معانا. البرامج إلي قدمناها ماهياش "ثمرة عمل فرق من المختصين و التقنيين المشهود لهم بالكفاءة على المستوى العالمي" لا هي "نتيجة منطقية لتبادل أراء و تصورات بين المواطنين في الجهات و فرق عمل متكونة من خبرات تونسية أهم ما يميزها هو غيرتها على تونس و حبها لبلادها أكثر من الشهائد العالمية و الخبرات إلي اكتسبوها بفضل عملهم". إي نعم المشروع إلي قدمناه هو مشروع تونس و برنامجكم موش برنامج حزب "أفاق تونس" فقط!

انشالله بدايةً من الأسبوع هذا باش تبدا سلسلة من الملتقيات الكبرى في كامل الجمهورية و نحبوكم تكونوا حاضرين معانا باش تطلعو على برنامجكم و برنامجنا كامل. البداية باش تكون في المرسى نهار الجمعة 30 سبتمبر 2011 مع الساعة 18 في صالة السينما الحمراء (مركب الزفير التجاري) و نهار السبت 1 أكتوبر 2011 مع الساعة 16 في نزل الحبيب في المنستير. حضوركم يشرفنا و يسعدنا. ثمة الناس إلي مازالوا ما حددوش اختيارهم الحزبي تكونلهم فرصة باش يجيو يعرفونا و يشوفوا تصوراتنا و افكارنا.

نذكروكم بالمواعيد الزوز :

- الجمعة 30 سبتمبر 2011, الساعة 18 : صالة السينما "الحمراء" (المركب التجاري الزفير) - المرسى

- السبت 1 أكتوبر 2011, الساعة 16 : نزل الحبيب - المنستير

تحيا تونسنا

يا المرزوقي لست منصفاً

عسلامة،

نعرفو الناس الكل إلي المعركة الإنتخابية و التنافس على كعكة المجلس التأسيسي (خاطر برشة أشخاص يشوفوا فيها كعكة ؛ شهرية مزيانة و صلوحية غير محدودة و يزيدوا يطالبوا بمدة غير محددة و الشعب يدفع في الأداءات باش هوما يقبضوا) ولو مازالت ما بداتش "رسمياً"، انطلقت فعلياً بطريقة أقل رسمية و هذا إنجموا نشوفوه في المواقع الإجتماعية، المواقع الرسمية على الأنترنات، المدونات الشخصية، حوارات صحفية، ... و هذا أمر عادي. بالطبيعة الدعاية السياسية تتمثل في تقديم البرامج و التصورات و الحلول إلي يقترحها المترشحين (أو احزابهم) باش نوصلو تونسنا لبر الأمان، هذا في صورة ما إذا اعتمدنا أساليب دعاية نزيهة و مسؤولة. لكن إذا كان المترشح ما عندو ما يقدم، غير الكلام، يطيح لأساليب، أحسن ما يقال عنها أنها تدل على إفلاس سياسي واضح نابع من إفلاس على مستوى البرامج إلي حضروها. باللغة الفرنساوية يسميوهم "les mauvais perdants" و بالفلاقي يتسماو "النغارة" أو "الهدارة" و بالفقهي "إنعدام الروح الرياضية" و عدم قبول الهزيمة.

نهار السبت و الأحد إلي فاتو شفنا صفحات في الفايسبوك ينشروا في مقتطفات لحوار اجراه السيد "المنصف المرزوقي" مع جريدة "المغرب" بتاريخ 17 سبتمبر 2011 و يذكر فيه من جملة ما ذكرو انو "من أبرز الأحزاب التجمعية الوطن المبادرة و أفاق تونس" مما يمثل إتهام خطير لحزب "أفاق تونس" تي سبة أكثر منو إتهام، خاصةً و انو في أكثر من مرة كذبنا الشائعات من ها النوع و بالعكس كنا من الأحزاب إلي دعات لمقاطعة التجمعيين إلي تبناو الفكر التجمعي الدكتاتوري الوصولي و عدم التصويت ليهم في إنتخابات المجلس التأسيسي. الغريب في الأمر إلي موش أول مرة يوجه فيها سي المنصف مثل هذا الإتهام لحزبنا و بالطبيعة إلى يوم الناس هذا ما عطا حتى دليل أو حجة على كلامو مما يعتبر غير معقول من رجل سياسة يعتبروه برشة ناس محنك و صاحب خبرة و تجربة. ما حبيناش نقومو بردة فعل متسرعة و مشينا نلوجو ثماش تكذيب للتصريح في المواقع الإفتراضية أو البيانات المنتسبة لحزب "المؤتمر من أجل الجمهورية" أو في تصريحات أخرى صحفية أو حتى على الموقع الرسمي متاع سي المنصف و النتيجة هي "لا شيء" مما يأكد صحة الخبر و التصريح.

في الحالة هذي مذابينا نقولو حويجة لسي المنصف ؛ أولاً يا سي المنصف و للمرة الألف، حزب "أفاق تونس" ما عندو حتى علاقة بالتجمع و لوكان كلفت روحك تعب التحول لمقر الحزب حذا وزارة التجارة و السياحة كنت تنجم تتأكد من المعلومة بنفسك، لأنو الفايسبوك عمرو ما كان وكالة أنباء بل بالعكس هو أقرب لإذاعة قالو، و هكا يكونلك خير من نشر "أكاذيب" ما عندها حتى تفسير إلا "الغيرة" من حزب حقق في أقل من 6 أشهر ما عجز عليه غيروا من الأحزاب إلي تعتبر في روحها عريقة و قدم مشروع دستور كامل و برنامج إجتماعي و إقتصادي مفصل و قادر على تحقيقو إذا الشعب أوكللنا المهمة هذي عبر صناديق الإقتراع، من غير ما يدخل في المهاترات و المزايدات الكلامية الفارغة و المفرغة إلي ما تجي كان مضيعة للوقت. ثانياً الأسلوب هذا في البروباغندا السياسية ما يخرجش عليك على خاطرو هو أسلوب تجمعي بحت و نذكروك إلي أي إنسان كان يختلف معاهم في الرأي كانو يستعملو معاه إتهامات بالتخوين و "تمسح على عتبات السفارات الأجنبية" و هات من هاك اللاوي و انت بالذات استعملوا معك نفس هالأساليب فبالتالي نقعدو متعجبين كيف اليوم تولي تستعمل فيها ! ثالثاً و إذا تحب تنقد أو تنتقد حزب "أفاق تونس" نعلموك إلي ما عندنا حتى مانع لكن يكون نقد موضوعي أو على الأقل يستند على "حقائق ثابتة" و من المستحسن يكون نقد موجه أكثر للبرامج مع إقتراح بديل، بالطبيعة، و في مستوى النقطة هذي ما نراو حتى مانع في مناقشة برامجنا أو حتى وضعها في إطار مناظرة مع أي برنامج أخر لأنو هذا يدخل في باب الديمقراطية و الحوار. رابعاً نطلبو منك توضيح في المسألة و إذا ثبت منك هذا التصرف فإننا نطالبوك باش تسحب كلامك و تعتذر أو تقدم دليل على الكلام إلي تقول فيه و تنجم تسأل سي "محمد عبو" بصفته محامي و يعتبر بذلك صاحب إختصاص إذا كان ما ينشر في صفحات الفايسبوك أو في مدونات شخصية يعتبر دليل.

في ختام الكلام إلي نتوجهولك بيه يا سي المنصف، حبينا نوضحو بعض الأمور : احنا مناش نشككو في تاريخك النضالي و لا في تاريخ أي شخص كان و موش من عادتنا باش نحكيو على الأحزاب الأخرى رغم كونهم جبدونا في أكثر من مناسبة بالباطل، لكن حبينا نذكروك إلي مناضل أو معارض لنظام إستبدادي قمعي ما يعطيكش الحق باش تعمل و تقول إلي تحب في حق عباد اخرين أو منافسين سياسيين ليك ؛ للتذكير غباغبو قبل ما يولي دكتاتور كان معارض و مناضل قديم ضد نظام بوانيي الدكتاتوري (مع العلم إلي بوانيي هو بيدو كان طبيب و مناضل حقوقي). نحبو زادة ننبهوك إلى كونو مصلحة تونس تطلب منا احنا كأحزاب، خاصةً، و كأناس مثقفين و واعين بدقة المرحلة و خطورتها، باش نرتقي بمستوى الحوار و النقاش السياسي لمستوى أعلى بكثير من مستوى نقاش ينجم يدور بين مشجعين متاع فرق كرة قدم في مقهى ما دون ذلك فإنو من حق المواطن التونسي باش يتسائل على مستقبل المجلس التأسيسي و مدى إمكانيتو في تحقيق الإصلاحات إلي يستنى فيها و مضحي على خاطرها.

تحيا تونسنا

إستفتاء على الصلاحيات لا، لكن، إستفتاء لتحديد مدة العمل

على سلامتكم،

عندنا برشة ما تواصلناش معاكم على طريق المدونة هاذي و انشالله تعذرونا كيف تعرفوا اللي الوقت كان قصير في شهر الصيام انشالله ربي يعاودو علينا و عليكم بالصحة و العافية و بالمناسبة انشالله عيدكم مبروك و كل عام و انتوما بخير. هذا ما يمنعش اللي كانت عندنا مهمة كبيرة تتمثل في تكوين قائمة كاملة باش تترشح لإنتخابات المجلس التأسيسي على دائرة تونس 1 متكونة من 100% من الشباب و إستقر الرأي باش خونا و صديقنا مهدي الرباعي يترأسها، انشالله ربي يوفقهم. اليوم حبينا نطرحو مسألة عملت ضجة في الأوساط السياسية في تونس : "الإستفتاء" اللي حزب "أفاق تونس" وضح موقفو منو في بيان صحفي.

منا تحرق و منا تكوي

ثمة احزاب، 47 على حد قول السيد الباجي قائد السبسي رئيس الحكومة الحالي (مذابينا كونو من جملة الحاجات اللي لازم نبدلوها و اللي موجودة كان في المجتمعات الدكتاتورية اللي تتكالب الناس فيها على المناصب، ذكر المنصب قبل الإسم في وقت اللي في كل المجتمعات المتقدمة يتذكر إسم المسؤول، إذا ما كانش مجهول، قبل ذكر المنصب متاعو على خاطر "ليس الفتى من يقول هذا منصبي، إن الفتى من يقول ها أنا ذا")، طلبوا باش نعملوا إستفتاء نضبطو فيه صلاحيات المجلس التأسيسي بالتوازي مع الإنتخابات، قال شنوة خايفين لا تكون السلطة المطلقة اللي باش تتعطى لمؤسسة شرعية (بما انو الشعب هو اللي اختارها و انتخبها) حافز لعودة الدكتاتورية (و راس لحنينة لن تعود).

هذا ما يمنعش إنو ثمة مخاطرة صغيرة تتمثل في انو المجلس التأسيسي يطول في القعدة في وقت اللي هو يبقى مرحلة انتقالية ثانية ما يفرق بينها و بين المرحلة الإنتقالية الحالية كان الإنتخابات. و صراحةً، الواقع الإجتماعي و الإقتصادي الحالي ما يتحملش حالة مطولة متاع عدم إستقرار و يفرض علينا باش "نخفو رواحنا" و بالطبيعة موش معناها نتعاملو مع الدستور اللي باش ينظم الإطار السياسي و الإجتماعي على الأقل 50 سنا باستخفاف. لا ! لازم نكونوا جديين في المهمة اللي أئتمنا عليها الشعب.

نشدوا العصا من الوسط

يرى حزب "أفاق تونس" إنو من غير المقبول تحديد صلاحيات المجلس التأسيسي (تو نفسرولكم علاش في الفقرة الجاية) خاصةً اللي كل يوم نشوفو في احتجاجات قاعدة تصير و بالتالي تعطيل النشاط الإجتماعي، الثقافي، الإقتصادي، الدراسي، ... إلخ. و اللي تجي تحكي معاه يقول مؤسسات غير شرعية و غير منتخبة و نقعدو ندورو في حلقة مفرغة. على الأقل كيف تولي سلطة تنفيذية انتقالية عندها نوعاً ما من الشرعية إنجموا نمتصو شوية من عدم الرضاء الشعبي و يولي من الأسهل اقناعهم بالصبر حتى ندخلو للمرحلة متاع الإستقرار السياسي و المؤسساتي النهائية. لكن باش نقيدو روحنا بإلتزامات تجاه المطالب الإجتماعية و الإقتصادية اللي متوقفة على دستور نهائي و واضح يخلينا ندخلو لجمهورية ثانية، من الواجب تحديد مدة صلاحية للمجلس التأسيسي اللي ينتخبوه المواطنين نهار 23 أكتوبر 2011. من ناحية أخرى، تحديد مدة زمنية يفرض علينا عدم الخوض في متاهات النقاشات (البزنطية بين قوسين) و هكاكة يلقى الشعب روحو في وضعية "شد الحيط هاني جيت". بالطريقة هاذي إنجمو نخلقو الرقابة اللازمة على السلطة و أساس للتقيم و المحاسبة بما انو باش يكون ثمة إلتزام بتقديم دستور صالح و جدي في أجل محدد و كيف ما يقول المثل "اللي عطاك حبل، كتفوا بيه". هذاكة علاش حزب "أفاق تونس" عبر على موقفو برفض إستفتاء يحدد صلاحيات المجلس التأسيسي لكن يطالب (إذا صح التعبير) بإستفتاء يحدد المدة الزمنية اللي يتم منحها للمجلس التأسيسي و إقترح 12 شهر كمدة معقولة.

علاش ما يتمش تحديد صلاحيات المجلس التأسيسي ؟

برشة عباد سألوا السؤال هذا و الإجابة تطلب تعريف مفهوم المجلس التأسيسي. المصطلح التقني و الأنسب هو "السلطة المؤسسة (بكسر السين الأولى) الأصلية" (Pouvoir Constituant Originaire) و هي السلطة اللي باش ينبثق منها إطار الجمهورية بما انها هي اللي باش تحرر أول مصدر للتشريع في الدولة اللي هو الدستور. عادةً المسير لأعمال الدولة هوما مجلس النواب و الحكومة اللي يمثلو السلطة التشريعية و التنفيذية اللي يعتبرو "سلط مؤسسة (بفتح السين الأولى)" (Pouvoir Constitué) و اللي عرفها جورج بردو (Georges Burdeau) المفكر و أخصائي القانون، بغض النظر عن موقفو من قوانين حكومة فيشي : "السلط المؤسسة (بفتح السين الأولى) لا توجد إلا في إطار الدولة : بدون إنفصال عن ترتيب قانوني محدد، هي في حاجةٍ لإطار عموميٍ يكون وجودها تجسيداً لواقعيته." (اعذرونا على الترجمة إذا ما كانتش في المستوى، الله غالب نظام بن علي و غيروا من الأنظمة العربية ما شافوش أهمية ترجمة مصادر المعرفة بقدر ما اهتموا بترجمة مسلسلات الأطفال، المسلسلات المكسيكية و غيرهم من الأعمال اللي ما شجعوش فيها على تكوين إنتاج محلي ياخو بعين الإعتبار الخصوصيات الحضارية و الثقافية متاعنا).

و بما انو ثمة غياب كلي للأطر القانونية اللي تنظم عمل الدولة، بعد إلغاء العمل بالدستور، و "السلط المؤسسة" فبالتالي عدم إمكانية تحديد صلوحيات المجلس التأسيسي و تحويلو لما يشبه برلمان مصغر (أو حتى "سلطة مؤسسة (بكسر السين الأولى) فرعية"، Pouvoir Constituant Dérivé). بالطريقة هاذي يصبح الإستفتاء على تحديد صلاحيات المجلس التأسيسي القانونية أمر غير معقول.

في الختام نجددو موقف حزب "أفاق تونس" المتشبث بأجراء الإنتخابات يوم 23 أكتوبر 2011 في إطار الشفافية و النزاهة.

تحيا تونس

العدل أساس العمران

عسلامة،

من غير ما نطولو الحديث و نعملوا مقدمة طويلة، حبينا نوجهو سؤال واضح و صريح للمسؤلين على "خروج" (أو بالأحرى هروب) سيدة العقربي و إطلاق سراح البشير التكاري : بأما حق؟ علاش؟ فسرولنا؟ وين تحبو توصلونا؟

الكل فاهمين و متفهمين عدم إمكانية حكومة انتقالية (أو مؤقتة) باش تحل المشاكل الكل و تصلح كل شي في ضرف كيف هذا. وسعنا بالنا، قلنا نعونوكم، نحاولو نهديو الناس باش نتعداو المرحلة هذي. لكن هذا ما يعنيش إلي احنا مستعدين باش نقبلو كل شي من غير ما نطالبو باش تفسرولنا علاش و كيفاش و نطلبو حد أدنى متاع تحمل مسؤولية من المسؤولين.

إذا كان المسؤولين الحاليين ماهمش قادرين باش يتبعوا كيف ما يلزم قضايا الفساد إلي صارو في عهد الزعبع، على القليلة ما نخليوش الفرصة للمتهمين (و المتهم بريء حتى تثبت ادانته) باش يسافروا للخارج. هذا يتسمى فسح مجال للتهرب من العدالة. زيد فوق هذا يتم إخلاء سبيل مسؤول سابق تحت المحاسبة تحت عنوان أسباب صحية في وقت إلي عادةً يتم إيداع مثل هالحالات في مستشفيات و يخليوهم تحت المراقبة.

صراحةً مناش نحسو إلي محاسبة المسؤولين السابقين على الفساد محاسبة جدية لأنو ما يهمناش قضايا إستهلاك المخدرات بقدر ما يهمنا قضايا إستغلال النفوذ و نهب أموال عمومية و التعذيب و القتل. لازم كل واحد متورط في قضايا من النوع هذا يتحاسب في أسرع وقت ممكن لكن بجدية مطلقة موش "كعور و إحسب الشعب أعور". كيف كيف مذابينا تحطونا على علم بتطورات القضايا و يتم توضيح كل قرار يصير و يكون متعلق بيهم. هذا موش من باب التشفي لكن من باب الشفافية إلي نحبوها تتوفر في القضاء متاعنا مع الإستقلالية.

شباب حزب "أفاق تونس" متشبثين بمطلب محاسبة الفاسدين محاسبة عادلة و جدية و كيف كيف متشبثين بوجوب استقلالية القضاء و تحملوا لمسؤوليتو التاريخية اليوم. نطالبو زادة بتوضيح القرارات إلي إتخذوها المسؤولين في الأيام إلي فاتو.

يحيا العدل و تحيا تونس

كرامة إنسانية

السلام عليكم،

سيدي رمضان فاحت ريحتو في بلادنا، الحوانت حضرت روحها، العباد تعول، ثمة شكون يحضر في روحو باش يمشي في عمرة في ها الشهر الفضيل (انشالله يمشيو و يجيو بالسلامة و ربي يتقبل منا و منهم صالح الأعمال)، حتى من الصغيرات إلي ما يقدروش على الصيام يتبادلوا في الخبرات في مجال "تخييط أيامات الصيام" و هالجو ما يتشراش بالفلوس. لكن من أهم ما يميز شهر رمضان (انشالله مبروك علينا و عليكم و تصوموه بصحة البدن) هو عادات مزيانة و إنسانية و دينية تبين قداش التونسي قلبوا كبير ؛ إي نعم في سيدي رمضان التوانسة يتفكروا الناس إلي ضوروفهم صعيبة و ثمة إلي يعطي فلوس و إلي يهز قضية و إلي يطيب و يوكل. حلول اختارها التونسي في إطار وعي بمشاكل غيروا و عدم إختيار العيش بأنانية لكن تبقى حلول وقتية ما تكفيش باش نوصلو نقضيو على الفقر بصفة كلية أو على القليلة نخفف منو.

الفرق بين الحزب و الجمعية الخيرية و إلا التحرك الشعبي هو كون الحزب يحاول يفكر في حلول على المدى القصير، المتوسط و الطويل للمشاكل. كيف نقولو حلول موش معناها نهزو كميون بالمواد الغذائية إلي وفات صلوحيتها و إلا نعملوا موائد افطار كيف ما كان يعمل التجربع في وقت زعبع باش يعملوا شوية تصاور من بعد يخدموا بيهم في حملتهم الدعائية. السبب الأول إلي يخلينا نرفض الحلول من هالنوع هو كونو هذا يتسمى اشتراء لأصوات الناخبين، ثانياً لأنو حل من نوع "الليقة تجيب" بلغة أخرى ما ثماش برنامج إجتماعي و إقتصادي واضح يخلينا نتعاملو بأكثر حنكة مع المشكل هذا و بالتالي نوليو نوهمو في المواطنين اللي حل مشكلهم يتلخص في زوز كيلو سميد أحرش و بيدون زيت حاكم بو 5 لترات في شهر الصيام. في كلمتين إفلاس سياسي من حيث البرامج و رشوة تتقدم للناخبين اللي يتم إستغلال ضوروفهم المادية.

حزب "أفاق تونس" خمم في مشكل الفقر في تونس و لقى اللي موش وجبة باش تحلها و لا محفظة معبية بالكتب باش تخلي العائلات الفقيرة تحس أقل بالفقر. حزب "أفاق تونس" فكر في حلول على قاعدة صحيحة و على طوال. أول حاجة بالنسبة لينا باش نحلو مشكل العائلات المحتاجة هو حماية و تدعيم مواطن الشغل "لا تعطيني سمكةً بل علمني كيف اصطادها" و بالطبيعة ما يكونش بحيث يولي المشغل محلول في العريض و يولي إستعباد كيف اللي نشوفو فيه في برشة مؤسسات (تشغيل أطفال، تغطية إجتماعية غير متوفرة، ...). ثانياً تدعيم التغطية الإجتماعية و الخدمات الصحية اللي لازم تتوفر فيها الجودة و بالطبيعة موش 10 مستشفيات في منطقة و 10 مناطق ما فيهمش حتى مجرد مستوصف باش يزرقو فيه. أصحاب الإحتياجات الخصوصية لازم ناخذوهم بعين الإعتبار و يكون ثمة برامج خاصة تتلها بيهم. ما يلزمش ننساو اللي التعليم و التكوين يمثلوا باب يحل بيبان الرزق (جدودنا كانوا يقولو "يوفى مال الجدين و تبقى صنعت اليدين") و هذاكة علاش لازم نوفرو تكوين و تعليم عندو جودة عالية في كل المناطق و يلزم يكون مناسب لسوق الشغل و حتى اللي "فاتو الترينو" لازم تتوفرلو فرصة جديدة باش ينجم يتكون. أهم حاجة لازم نركزو عليها كيف نحكيو على الشهايد و التكوين و التشغيل، هي "الإستحقاق" معناها اللي يشد خدمة يكون بجدارة موش بالمعارف و الأكتاف و نلقاو شكون بوه دبرلو خدمة ينطر منها مصروف خرجاتو و سهرياتو في وقت اللي ثمة شكون أحق و أكثر منو كفاءة قاعد بطال في وقت اللي موطن شغل يخليه ينتقل من مجرد مواطن إلى مواطن يعيش بكرامة من غير ما يقعد يستنى شكون باش يجي يحن عليه من عام لعام. في البرنامج المفصل متاع حزب "أفاق تونس" اللي قريب يتم الإعلان عليه باش نوضحو الوسائل اللي باش نحققو بها الأهداف هاذي.

هذا ما يمنعش اللي احنا نشجعو كل مبادرة متاع مواطنين أو جمعيات يقدموا مساعدات إنسانية "لله في سبيل الله" خاطر هذاكة اللي يخلينا نحسو ببعضنا و نفكرو في المصلحة متاع المجموعة بعيد على الحسابات الشخصية الضيقة و الأنانية. التونسي ضهر للعالم أجمع اللي هو مثال في التكافل الإجتماعي (مثلاً في التعامل مع أزمة اللاجئين من ليبيا) و نحبوه يقعد ديمة مثال يحتذى بيه. و قبل ما نختمو نتمناو للشعب التونسي رمضان مبارك ( إلا أخطانا من مبارك و الزين ما صدقنا ارتحنا منهم)، رمضان كريم و كل عام و انتوما بألف خير.

تحيا تونس

إذا الشعب يوماً أراد الإنتخابات، فلا بد من التسجيل في القائمات

عسلامة،

اليوم و بمناسبة عيد الجمهورية، حبينا نحتفلو بذكرى القضاء على النظام الملكي في تونس. تو 54 سنا ملي تنحى النظام الملكي و تم تعويضو بنظام جمهوري (من غير ما ندخلو في تفاصيل من نوع الإنفراد بالحكم و تغيب الديمقراطية الفعلية و غيرهم) و هذا يتسمى أول خطوة باش نوصلو نهار لنظام حكم يضمن حرية إختيار الشعب لممثليه و لحكامو في إطار الديمقراطية. النظام الجمهوري الحالي بين إلي تنقصوا برشة حاجات باش يكون أكثر مثالية و أهمها تفعيل التعددية، فصل فعلي بين السلطة التشريعية و القضائية و التنفيذية و بالطبيعة في إطار إستقلال كلي في ما بينهم و إعتماد مصدر وحيد للشرعية إلي هو الشعب. هذاكة علاش رينا إلي النظام الجمهوري الحالي وقفت بيه الزنقة و لقينا إلي لازم إطار جديد نبنيو فيه ما سميناه "جمهورية ثانية" بعد الثورة إلي قام بيها، للتذكير، الشباب (باش تعرفوا حجم المسؤلية إلي عندنا باش انجحوا المشروع متاع الدولة التونسية الحديثة إلي تقطع مع الصنايع الفاسدة كيف الإنفراد بالسلطة، التعددية الشكلية، القمع متاع الحريات، إحتكار القرار، ... ).

إحتفال العام هذا خاص برشة خاطر جا في وسط حملة تسجيل الناخبين في القائمات الإنتخابية. الشباب التونسي و خاصةً منهم المدونين قرروا باش يحتفلوا على طريقتهم الخاصة (كيف جرات العادة قبل في كل ما صارت أحداث تهم البلاد كيف أحداث الحوض المنجمي، صنصرت المدونات، ...) و المسؤولة بتخصيص تدوينة لتشجيع المواطنين على تسجيل اسمائهم، مدام اليوم فيشطة و عملية التسجيل ما تتكلفش حتى مليم : 3 دقائق و تلقى روحك عندك بطاقة ناخب. شباب حزب "أفاق تونس" هوما شباب تونس قبل كل شي و الواجب الوطني بالنسبة ليهم يجي قبل كل شي. حبينا احنا زادة نكونوا مساهمين في حملة التوعية هاذي (ولو بدينا فيها تو أكثر من أسبوع) و نحتفلو مع الشباب التونسي على الطريقة إلي اختارها : أسلوب حضاري و راقي كان و مازال عادة حلوة تورينا نضج شبابنا.

اليوم ثمة أقل من 10% من الناخبين قيدو اساميهم. رقم بقدر ماهو صغير، يخوف! علاش؟ على خاطر يخلي الباب محلول باش يكون المجلس التأسيسي ما يمثلش التوانسة. إي نعم، في أحسن الحالات باش يمثل 10% من الشعب و لا قدر الله (مع العلم إلي هذا إحتمال وارد جداً) يكونوا جماعة التجربع إلي بيتو الحس و لعبوا لعبتهم تحت حس مس و رجعوا عن طريق صندوق الإقتراع. هذاكة علاش يلزمنا الكل نجريو لمكاتب التسجيل من غير ما نزيدو نستناو. ما تنساوش باش تهزوا بطاقات التعريف معاكم (ما تخافوش ماهياش مرفلة). كيف ما حكينا في السابق، حتى لوكان مازلتو ما حددتوش إختيار إمشيو خاطر تنجم تكون نهار 23 أكتوبر توضحت الرؤية متاعكم. إلي قيد ينجم يحاول يقنع أكبر عدد ممكن من أحبابو باش يمشيو اليوم.

للتذكير، حزب "أفاق تونس" متشبث بموعد 23 أكتوبر كموعد للإنتخابات متاع المجلس التأسيسي و يأكد على دور المجتمع في الحرص على كونها لازم تكون ديمقراطية و نزيهة و أول حاجة ينجم يعملها هي تسجيل اسمو في القائمات. الإنتخاب حق و واجب و أضمن وسيلة باش ما نرجعوش لنظام دكتاتوري كيف إلي كنا عايشين فيه. كيف كيف هو الوسيلة الوحيدة باش نرجعو الشرعية لمؤسسات الدولة و الخروج من متاهات معطلة مصالح تونس اليوم (المستثمر إلي باش يخلق مواطن شغل و يدور عجلة الإقتصاد ما ينجمش يعطي الثقة في مؤسسات وقتية أو انتقالية بقدر ما يثق في نضام منتخب و رسمي، على سبيل المثال).

تحيا الجمهورية التونسية، تحيا تونس

انا قيدت و انتي وقتاش ؟

عسلامة،

اليوم نهار أحد، لا ثمة إدارة تخدم و لا ثمة ماتش في ستاد و لا ثمة قضية الشهر (خاصةً كيف نعرفو إلي التونسي يبدا على الحديدة من نهار 10 في الشهر في سائر الأيام، خلي انتي كيف تبدا عطلة و تشخليع). اليوم البلاد الكل تبدا فارغة، في أحسن الحالات تلقى عباد في الشط، صف كراهب في محطات غسل السيارات و في القهاوي مع العشية وقت تنقص الشمس. في نفس الوقت ثمة إدارة هامة تخدم اليوم و رغم هذا ما ثمة حد شادد الصف عليها : مراكز التسجيل في القائمات الإنتخابية.

التونسي عندو برشة مشاغل تخليه ينسى حاجة كيف هكا خاصةً إذا ما يلقاش شكون يفكروا. اليوم ما ريناش الأحزاب و إلا المجتمع المدني يلعب في دورو كيف ما يلزم باش يذكر العباد باش تمشي تقيد روحها في قائمة الناخبين. من ناحية أخرى مراكز التسجيل ما يكفيش كونها شوية، زيد فوق هذا ما عملتش مجهود إضافي باش تزيد تسهل العملية على المواطن و تخليه ما يبداش يفكر كيفاش و وقتاش يفضي روحو باش يمشي يقيد. يا ناس إذا ما تقيدوش ما تنتخبوش، بلغة أخرى "ما تقرروش مصيركم" و غيركم هو إلي يقررو و إلي خرج من الباب ينجم يرجع من الشباك على خاطر الناس ما عطاتش أهمية كافية للإنتخابات.

التوانسة إلي يغيروا على حقهم في تقرير مصيرهم يلزمهم اليوم قبل غدوة يتصبو في مراكز التسجيل في أي بلدية (تنجم تقيد وين تحب) أو في قنصلية أو سفارة تونسية و يهزوا بطاقات التعريف متاعهم و يشدو الصف باش ما تفوتهمش هالفرصة التاريخية. كيف ما نشدوا الصف على الخبز، على المثلجات، على الكسكروتات، على التعريف بالإمضاء، ... لازم نشدو الصف زادة على الديمقراطية، على حقنا في الإنتخاب، على حريتنا في تقرير مصيرنا. كيف كيف نطلبو من الهيئة إلي تنظم في عملية التسجيل باش تقوم بمجهود إضافي و تزيد تسهل العملية على العباد. نعملوا خيمات في الشطوط، في الساحات إلي يتجمعوا فيها المواطنين في الليل أو في العشية، في الأسواق، يعملوا دورة على القهاوي، في المهرجانات، ... أقربو للمواطن، إمشيولوا، إجلبوه، حسسوه إلي العملية ساهلة موش باش اتعبوا بالكل! الأحزاب، الجمعيات، المنظمات، النقابات، ... عاونوا اللجنة بتشجيع المواطنين على التسجيل، راهي مسؤلية مشتركة، موش مسؤلية جهة أو حزب فقط!

ثمة عباد قالو ما نعرفوش شكون باش ننتخبو لذا علاش نمشيو نقيدو رواحنا ؟ نقلولهم : اليوم احنا في جويلية و الإنتخابات في أخر أكتوبر، معناها من هوني للموعد متاع الإنتخابات، إلي للتذكير حزب "أفاق تونس" يتشبث بموعد 23 أكتوبر 2011 كموعد للإنتخابات، مازال 3 شهور و يمكن في الثلاثة أشهر هاذم تتبدل رؤيتكم للواقع السياسي و تلقاو شكون إلي يتبنى أفكاركم و تعطيو فيه الثقة باش يحاول يطبقها على أرض الواقع. إذا انتي ما تسجلش اليوم تلقى روحك نهار 23 أكتوبر تحب تصوت لقائمة لكن ما تنجمش ! و بطبيعتك ما عندك ما تخسر إذا تقيد روحك في القائمات لذا خلي لروحك بأزيد فرصة و برا سجل. ملاحظة صغيرة حبينا نختمو بيها كيف تسجلوا اطلبوا الملصقات إلي يوزعوهم مجاناً مكتوب فيهم "أنا قيدت" و حاولوا تلصقوهم في بلايص تتشاف خلي تكون طريقة أخرى لتحسيس المواطنين.

تحيا تونس

قف هنا جامع

عسلامة،

سامحونا كان وخرنا شوية في أخذ موقف، الله غالب بكلنا حاركين في الملتقى إلي انظموه غدوة السبت 16 جويلية 2011 في المرسى، في البطحة إلي بحذا دار الشباب مع الستة متاع العشية. هذاكة علاش ما تفاضينا كان تو باش نعبرو على موقفنا من إلي صار في جامع القصبة، اليوم 15 جويلية 2011.

أولاً احنا ما يهمناش الإعتصام و ماناش باش نحكيو عليه. احنا باش نحكيو على تجاوز خطير و "مقزز" صار ضد جامع في تونس. الجامع إلي كيف ندخلولو إنحيو صبابطنا و الكلاسط إذا فيهم ريحة خايبة. الجامع إلي كيف نتكلموا فيه نوشوشو حتى إذا كنا وحدنا و هذا خاطروا مقدس و مكان للخشوع. الجامع إلي أول ما ندخلولو نعملوا ركعتين تحية المسجد كتعبير على احترامنا ليه و ترفيع لمقامو. الجامع إلي يمثل واحد من أهم الرموز لدينينا.

اليوم اقتحمت الشرطة الجامع باش تفك إعتصام بالقوة. بطبيعة الحال ما خرجوش المواطنين بالتنويم المغناطيسي أو بدرس ديني. الكلنا نعرفو تعاملات الشرطة و نعرفو إلي في حالات كيف هاذي، العنف يكون حاضر مادياً و لفظياً. معناها اليوم أفعال و أقوال منحطة صارت في جامع القصبة. إذا صارت في القدس يمكن ما نستغربوش برشة إلي صار، لكن هذا صار في تونس و ما يقبلوا حتى شخص مهما كانت معتقداتو. مكان عبادة يلزم نحترموه و الإعتداء على حرمتو و قداستو "جريمة خطيرة" ما يسكت عليها حد.

اليوم الأحزاب الكل اتفقت على تحييد دور العبادة و الصلاة عن العمل السياسي و باش ما ندخلوهاش في معمعة الإختلافات و الحسابات متاع مجموعات على حساب مجموعات اخرين. هذا يعني إلي عون الأمن، بنفس المناسبة، ما عندوش الحق باش يقوم بأي تدخل في وسط الجامع إلا في حالة ما ثمة خطر على حياة المصلين أو إذا كان دخل باش يصلي على روحو كمسلم موش بصفة عون أمن.

الإعتداء إلي صار على الجامع اليوم هو إعتداء على مقدساتنا و احنا نرفضوه مهما كانت الأسباب و الأشكال. كشباب حزب "أفاق تونس" أو كحزب "أفاق تونس" متفقين إلي المسؤولين على المهزلة إلي صارت اليوم يلزم يتم التحقيق معاهم، تحديد المسؤليات و العقوبات اللازمة على المخالفين. كيف طالبنا الأمن باش يخدم خدمتو و يتصدى للتجاوزات، ما قصدناش كونو يولي الأمن عندو صلوحية مطلقة في التعامل مع إلي يراهم مخالفين.

و تحيا تونس

تحدانا السياسيون المسنون و قالو أن الشباب لا يمكن لهم أن ينجحوا ملتقًى سياسياً

عسلامة،

كان تتفكروش أول تدوينة تكتبت هوني، حكينا على دور الشباب في الأحزاب. وقتها قلنا إلي الشباب في حزب "أفاق تونس" مناضلين بالفم و الملا. ناس يخدموا في خدمة صحيحة باش يقلعوا بلايصهم في الحزب و اللجان إلي ينشطوا. اليوم حبينا نحكيولكم على خبير مزيان "لو مكسيموم" هذاك علاش كملوا أقراو حتى للأخر.

اسئلة خطيرة :

علاش كل ما يجي شكون يحكي في التلفزة في الأسابيع الأولى إلي بعد الثورة كان يحكيلنا على دور الشباب و الشباب تباركالله عليه، الشباب هدالنا الحرية، الشباب عطانا الديمقراطية (ياخي غرتو عليها و خليتو الشباب على مقعد الإحتياط يتفرج)، ... و هات من هاك اللاوي !؟ اش بيهم اليوم نساو الشباب ؟ علاش العباد الكل خذات حضها و حكات في وسائل الإعلام و قعد الشباب مرهون في شوية بلوغات (مدونات) و الفايسبوك، نهار إلي تقص الأنترنات ما يلقى وين يسمع صوتو ؟ اش بيهم في الملتقيات دور الشباب محصور في فنان يغني و إلا عون إستقبال و بالطبيعة التصفيق ؟

نلعب و إلا نحرم

السؤالات هاذي سألناها في حزب "أفاق تونس" بعد ما ورينا إلي احنا ناضجين بما فيه الكفاية. الحقيقة، الكل كانوا متفقين معانا في فكرة "الشباب لازمو ياخذ الكلمة" و تم تفاهمنا باش نعملوا ملتقى ينظموه شباب حزب "أفاق تونس" و ينشطوه و يكون كيف ما يحب أي شاب تونسي تكون الملتقيات متاع الأحزاب. من غير ما نقولولكم إلي ولينا نخدمو دوبل و تريبل (Double و Triple) خاطر عارفين إلي نجاح الملتقى هذا مش باش يحل البيبان لشباب حزب "أفاق تونس" برك، لكن للشباب التونسي بصفة عامة : وسائل الإعلام باش يفهموا إلي برنامج أو زوز في الأسبوع ما يكفيوش باش نعبرو على افكارنا و طموحاتنا، النشاط السياسي يولي ما عادش حكر على الكهول و "المسنين"، ... و علاش لا نشوفو نهار وزير شباب أقل من 35 سنا (موش 60 سنا فما فوق كيف ما عودونا) !

شنوا رايك ؟

الملتقى هذا إخترنالو شعار "شنوا رايك ؟" و ماهوش سؤال إنكاري، لكن دعوة صريحة باش الشباب يعبر على موقفو و يطالب باش يكون عنصر فاعل في المجتمع و في تقرير مصيرو. الشباب (بين 18 و 30 سنا) يمثلوا أكثر من 60% من المنتخبين، بالفلاقي "الاخرين يلموا بعضهم في جمعية و ما يربحوناش" ! مصير تونس إنجموا احنا نسطروه كان نختارو باش نتحملو ها المسؤلية.

وين و وقتاش ؟

نهار السبت 16 جويلية 2011 في العشية (الوقت تو يتم تحديدو لاحقاً) على شط المرسى (بحذا دار الشباب) باش نخرجو من البلايص المسكرة و يكون الجو صيافي. شوية غنا، شوية جد و مواضيع تهم الناس الكل موش الشباب فقط و حوارات مفتوحة باش نتناقشو و نتبادلو الأراء و طريقة رؤية الأشياء. حضوركم يشرفنا.

يحيا الشباب و تحيا تونس

بعد صنصرة الواب، صنصرة الأحزاب

على سلامتكم،

ما يخفاش عليكم الغرايب إلي صارت في أخر الجمعة إلي فاتت في المهدية و قفصة مع حزب "أفاق تونس" و حبينا نحكيولكم أكثر شوية على إلي صار. أحداث تشبه للكذب تخلي الواحد يسئل روحو شنية أسباب، و خاصةً، مسببات ها الأحداث؟

نهار السبت إلي فات، كان في برنامج حزبنا باش نقدمو برنامجنا الثقافي و اخترنا البرج العثماني إلي في المهدية باش نعملوا ملتقى نتلمو فيه مع المواطنين و نحكيو في الموضوع. بالطبيعة، طلبنا ترخيص و خذيناه و بدات رحلة الشروطات : ما ثماش منصة، قلنا موش مشكل و تصرفنا في منصة من عندنا. زادوا شوية و قالو رهو الضو مقصوص خاطر الفاتورة موش خالصة، كيف ما قال عادل إمام "احنا حنصرف عالحكومة؟" و من بعد قلنا ما مشاش عند غريب، بلادنا و ما ليها كان اولادها، خلصنا الفاتورة و رجع الضو يخدم و الأمور الكل ركحت. نهار الملتقى، يجينا فاكس من وزارة الثقافة يقول بالحرف الواحد "الرخصة إلي خذيتوها تعطات في قالب غلطة" معناها الوزارة مستعرفة إلي احنا عندنا رخصة أما كل ما في الأمر "غلطة" لا أكثر و لا أقل، ناقص كان باش يقولو الموظف نهارتها صبح ناقص نوم صبح في عرس ياخي صبح دايخ و عطا رخص هكاكة!

باهي يا سيدي كيف هي الرخصة تعطات بغلطة، ما فقتو بيها كان ليلة صلى الله؟ و الأغرب هو السبب : "تحييد الأماكن التراثية و الثقافية من العمل السياسي" في وقت إلي في نفس النهار ثمة حزب أخر عمل إجتماع في "دار الثقافة" (زعمة دار الثقافة تابعة لوزارة الفلاحة و الصيد البحري خاطرها بحذا البرط؟). تو هذا شنية يتسمى؟ لا و يعطيك العاطي مرسول الوزارة يقول إلي ثمة "ضغوطات" و هذاكة علاش يلزم نلغيو الإجتماع. ضغوطات من طرف شكون؟ بأما حق؟ هههه والله كثر الهم يضحك! معناها إليوم ثمة أطراف تنجم توصل تضغط على مسؤول حكومي تخليه يتراجع على قرار خذاه ؟ فكرونا في هاك الغناية "شبكنا الحكومة" متاع ريا و سكينة.

ما دام حال، عملنا الإجتماع قدام البرج و كان ناجح و لاباس. "الحبس كذاب و الحي يروح" كيف ما يقول عنوان كتاب سي فتحي بن الحاج يحيى.

إلي صار في إجتماع المهدية حاجة و إجتماع قفصة حاجة أخرى. كرينا محل خاص و نهار الأحد كان عندنا موعد مع المواطنين في قفصة. مع نصف الليل بالضبط، يكلمنا السيد مولى المحل و يقوللنا سامحوني ما إنجمش نعطيكم الصالة خاطر ثمة عباد كلموني و هددوني يحرقوها لوكان يصير الإجتماع. إيه شكونهم؟ شي ما حبش يقول. كيف مشينا الغادي نلقاو حتى من المعلقات متاع الدعوة للإجتماع قطعوهم و يكملوا يستقبلونا يجي 15 شخص بالإحتجاجات قال شنوا احنا تابعين حزب التجربع (مع العلم إلي لحكاية هاذي وضحناها أكثر من مرة و إتهام باطل). كيف كيف ياسين براهيم (إلي بالمناسبة من المؤسسين متاع حزب "أفاق تونس" موش انضملوا بعد إستقالتو من الحكومة كيف ما قاعدين يقولوا برشة وسائل إعلام) شملتو الإحتجاجات و بالطبيعة ما كان ثمة حتى سبيل للنقاش و الحوار، الشي إلي يخلينا نتسائل : "كيفاش نحبو ديمقراطية في وقت إلي نرفضو الحوار؟" ولينا روحنا على رواحنا و الغينا الإجتماع.

الحكاية ما وفاتش غادي، بعد ما روحنا، ثمة شكون تعرض لأعضاء من الحزب و هددهم و ثمة إلي استعملوا معاه العنف لوكان موش بعض المواطنين إلي بعقلهم ركحوا الجو، يرحم والديهم، و ما يخفاكمش عناصر الأمن كانوا فرايجية من الطراز الرفيع و ما إتدخلوش باش يمنعوا حصول كارثة كانت تنجم تصير نهارتها (و هاذي موش أول مرة تصير في المدة الأخيرة و خاصةً في اجتماعات احزاب).

للتلخيص، في نهارين زوز اجتماعات يتعرضوا لسابوتاج بما انو وزير الثقافة في مراسلتو يحكي على "ضغوطات" و مولى الصالة يحكي على "تهديدات" الشي إلي يخلينا نحاولو نعرفو شكون يدو طويلة لها الدرجة باش يوصل يأثر على حكومة و يبعث شباب يفسدوا إجتماع؟ علاش؟ في مصلحة شكون؟ من وقتاش ولات الأماكن الثقافية يلزم يتم تحيدها في وقت إلي دور الثقافة احتضنت اجتماعات برشة احزاب بما فيهم حزب "أفاق تونس" ؟ ...

ملاحظة صغيرة في الختام و موجهة لوزارة الثقافة : بعد الحجب "الإيجابي" أو الصنصرة إلي رجعت في الأنترنات، ولات وزارة الثقافة تمارس "تحت ضغوطات" (برجولية كلمة جديدة ليكس باش نزيدوها لقاموس الثورة مع كلمة إشاعة و مندسين و أطراف مجهولة و ...) في صنصرة الإجتماعات الحزبية. لذا مادامكم منخرطين في ها المنظومة لازم عندكم فكرة وقتاش باش يتم حجب مواقع الأنترنات متاع الأحزاب "تحت ضغوطات"! ماذابينا كان تعلمونا من تو خلي نحضرو رواحنا.

عيطة و شهود و الحاكم مفقود

عسلامة،

أول مرة مش باش نعملوا مقدمة طويلة عريضه و باش ندخلو طول في صلب الموضوع. ملاحظة صغيرة أولاً، المدونة هذي خاصة بشباب حزب "أفاق تونس" و تعبر على راي الشباب متاع الحزب و بالتالي إلي يحط ملاحظة مذابيه تكون موجهة ليهم بالخصوص. أما بعد، إليوم صارت حادثة خطيرة بأتم معنى الكلمة في شارع الحبيب بورقيبة (بحذا وتيل الافريكا بالضبط) و تتمثل في كونو مجموعة مالأشخاص إعتداو على قاعة السينما إلي لاصقة في النزل و ضربوا المكلف بالحراسة و الحاضرين كيف سي الحبيب بالهادي و كسرو تجهيزات القاعة. السبب هو الفيلم متاع نادية الفاني "لا ربي لا سيدي" إلي تعرض في إطار التضاهرة "نحي اديك من على مبدعينا" (ياخي نحاو ايديهم و حطوا عصا في بلاصتها). المجموعة هذي نصبت روحها "متكلم بإسم الله في الأرض" و "هيئة الأمر بالمعروف و النهي عن المنكر" بدون وجه حق. بالفلاقي "سلطة قضائية، تشريعية و تنفيذية في نفس الوقت" في وقت إلي نلوجو كيفاش نرجعو تونس دولة قانون.

موش عاجبك الفيلم، تشوف فيه إعتداء على المقدسات و سب جلالة، انتي حر، تنجم توكل محامي و ترفع قضية في الحكاية و "القضاء المستقل" هو يحكم يتعدى الفيلم و إلا لا، و ثمة سلطة تنفيذية (الشرطة) تشرف على تنفيذ الحكم القضائي هذا إذا حكم ضد الفيلم. من جهة أخرى، كيف نتوما حرقتكم قلوبكم برشة على الذات الإلهية علاش كيف يبداو كمشة باربوات يربربو على طول اصواتهم في الكياس حتى حد ما اتدخل على الأقل بالإتصال بالشرطة؟ زعمة على خاطر هاذوكم فنانين ما ينجموش يدفعوا على رواحهم بأساليب عنيفة و متخلفة متاع مجرمين و قطعية؟

من ناحية أخرى الشرطة وينها؟ وزارة الداخلية بعيدة أقل من 100 متر على السينما و كيف بدات تتلم حضبة ما بعثوش حتى حد باش ما يخليوش الأمور توصل للي وصلتلو ! معناها كانت تنجم تصير مذبحة نهار إليوم و حتى حد ما يتدخل بالسرعة اللازمة ! و أحسن من الكل بحذا وتيل 5 نجوم و التوريست يتفرجوا و معرضين باش يلحقهم الطش كيف ما صار في نابل ! و تحبو السياح تجي؟ لا جاو بالقدا !

شباب حزب "أفاق تونس" الكل ضد المهزلة إلي صارت إليوم كيف إلي معارض للفيلم كيف إلي ماهوش مقلقو برشة لسبب وحيد هو العنف الجسدي إلي تعرضولو مواطنين بسبب أفكارهم. ما إنحبوش تونس تولي غابة : كل حد يحكم وحدو لا قانون لا دستور ! الشباب إلي في الأحزاب الكل لازمهم يتحركوا و يقومو بواجبهم في تأطير أصحابهم و توعيتهم بأنو في "دولة القانون" أي تدخل كيف إلي صار إليوم يتسمى "خروج على القانون"! كيف كيف السلطات الدينية لازمها تلعب دورها باش تقاوم التيارات "الجهادية التكفيرية" المتطرفة إلي لاهية تستغل في المرحلة هذي باش اتدخل الشباب متاعنا في متاهات خايبة ياسر و الأحداث إلي صارت في الجزائر الشقيق في التسعينات شاهد تاريخي و دليل على ذلك.

ربي يقدر الخير و تحيا تونس

إنتخابات المجلس التأسيسي و الهيئة : يا سلام على حبي و حبك

عسلامة،

تو عندنا مدة ملي الاحزاب و الحكومة و لجنة تنظيم و مراقبة الانتخابات و هيئة الإصلاح السياسي و حماية أهداف الثورة ... دخلوا في حرب على حكاية "توخير الإنتخابات" إلي كانت مبرمجة في 24 جويلية و لجنة سي كمال الجندوبي قالت مستحيل قبل 16 أكتوبر و الاحزاب تحتج و الهيئة تصر إلحاحاً على 24 جويلية و الحكومة قالت في أخر حلقة يا سيدي 23 أكتوبر و حد ما يتغشش و فجأةً وقف القصف (الإعلامي) بين الأطراف المعنية الكل و قراو الفاتحة و لعنوا الشيطان و رجعت العباد الكل تخدم على أساس إليد في إليد باش ما ترصيش حتى من موعد 23 أكتوبر نوخروه.

الخوضة إلي صارت كيف وخروا الإنتخابات خلاتنا نتوقعو إلي الناس الكل باش تتحمل مسؤليتها التاريخية و إلي باش يحطو مصالحهم الشخصية على جنب و نتجنبو النقاشات البيزنطية إلي تخلينا نحفرو في البحر. ما راعنا كان الرجوع للنقاشات، إلي كانت بالمناسبة من بعض أسباب بطء لجنة سي عياض بن عاشور في الوصول لإنتخاب لجنة تنظيم الإنتخابات و مناقشة كل ما يهم المجلس التأسيسي، كيف حكاية الهوية (في وقت إلي الاحزاب الكل قالت "العربية لغتها و الإسلام دينها") و غيرها من المواضيع إلي ما عندها حتى نتيجة سوى الوصول لموعد 23 أكتوبر في حالة ما تخليش الإنتخابات تصير و بالتالي نقعدو في أزمة سياسية تزيد تتعمق كل يوم في وقت إلي مصلحة تونس تطلب التسريع في تكوين مؤسسات شرعية منتخبة من الشعب باش نخرجو من هالحلقة المفرغة متاع التشكيك في شرعية كل ما يزيد أو ينقص في البلاد.

اليوم في وقت إلي ثمة شباب يستناو في شهايد التخرج متاعهم (إلي تعني الإلتحاق بصفوف البطالة أو طالبي الشغل كيف ما يسميوها المسؤولين، في إطار اللعب على بسيكولوجيا المستمع) و عباد اخرين يشوفوا في سيدي رمضان على الأبواب و دخول الصغيرات للمدارس مما باش يزيد يعمق الازمة المادية إلي يعيشوا فيها، قعدت اللجنة تناقش في مسائل أبعد ما يكون على أولويات المواطن العادي إلي موش متسيس أو متحزب. الله أعلم شنية الغاية من إختلاق التعطيلات هذي الكل و شنية دوافع الأشخاص إلي يعملوا في "تحويل وجهة" للهيئة من "حماية أهداف الثورة" إلى "مراوغة بأهداف الثورة" ؟ في حزب "أفاق تونس" نؤمن إلي "إذا كانت الدكتاتورية جريمة في حق الشعب، فتعطيل المسار الديمقراطي هو جريمة بنفس الخطورة" خاصةً إذا كان الإنتقال الديمقراطي "أمانة" في عنق الشخص أو الأشخاص إلي يعطلوا في الإنتقال.

اليوم حسينا الي ثمة برشة أطراف معنية بالمجلس التأسيسي عاملين مع الإنتخابات كيف "شادية" و "فريد الأطرش" في غناية "يا سلام على حبي و حبك"، الظاهر هو حرص كبير على القيام بالانتخابات في أسرع وقت و الواقع هو العكس تماماً. الأطراف هاذم لازم شكون "يفيقهم على وضعهم" شوية على خاطر المرحلة هذي باش تقرر مصير شعب كامل و حالة عدم الإستقرار إذا تزيد تطوال تنجم توصل بينا لوضعية تشبه لبلجيكيا ولا لبنان، باش ما نكونوش متشائمين برشة و نقولو توصلنا "لحالة من الفوضى".

تحيا تونس

احزاب "فرض" و احزاب "سنة" و احزاب بدعة

عسلامة،

العباد الكل تتفكر نهار 13 جانفي 2011 وقت إلي وسائل ال"اع"لام عملت ثورة في الدقيقة 90 و فقنا على صحافة عاملة مع زعبع كيف ما عمل "المتنبي" مع "كافور الإخشيدي" : و ملي كانت "العائلة السعيدة" ولات عائلة المافيا و الصحافة الكل تسبلها في والديها و خاصةً "بوها الزين" و أمها ليلى. و كيف ما علمونا "ربي يمهل و لا يهمل" و في "عبد العزيز الجريدي" عبرة لمن يعتبر باش يعرف إلي مش كل شي يتنسى بسهولة. باش ما نضلموش العباد الكل ثمة صحفيين كانت و مازالت عندها قيم و الحمد لله. التونسي ما يحبش يشد البغض في قلبوا ياسر، قال عفا الله عما سلف و "المسامح كريم"، انشالله تكون طريحة التوبة. "احنا هكا" قلوبنا كبار و ما نقصوش يد السارق قبل ما يسرق (ساعات زادة حتى بعد ما يسرق).

امشي يا زمان و ايجا يا زمان و "يا مرحبا بأحزاب سيدي هلو جماعة" و انشالله المشادات إلي نشوفو فيها بين بارشا احزاب ما توليش "سلو سيوفهم لماعة" بالمجد و تولي حرب. أكثر من 80 حزب، عين الحسود فيها تل مصدد، و كل حزب من حقو كونو يقدم برمجوا و الأجندة متاعو و هذا الكل باش نهارت إلي التونسي باش يمشي ينتخب ما يمشيش يختار "قطوس في شكارة". موش العباد الكل تنجم تحضر في الملتقيات و إلاجتماعات و التظاهرات ... ثمة ناس ما ينجمو كان يتفرجوا في التلفزة و يسمعوا الراديو و يقراو الجرايد و المجلات. وسائل الإعلام الخاصة حرة في برامجها في إطار إحترام مبدأ "المصداقية" و إلي يشتهي شهوة يديرها في عشاه، يا أخي في عوض يدعم حزبو المفضل بالفلوس يدعمو و يكون في "نصرة" أهدافو بقناة تلفزية أو إذاعية و "ربي يثبت الأجر"، و لو من شرف مهنة الصحفي هو التعامل بحياد مع جميع الأطراف و التعتيم على الخبر في حد ذاتو نوع من الإخلال بالحياد. لكن التلفزة الوطنية و غيرها من وسائل الإعلام الحكومية ما ينطبقش عليها الحكم هذا على خاطرها تاخو في فلوسها من عند الناس الكل عن طريق الأداءات و هاك المعلوم المحنون متاع الإذاعة و التلفزة إلي في فاتورة الضو. بعبارة أخرى الشعب الكل عامل عليها مزية و يلزمها تتعامل معاه بعدل.

ما يكفيش التلفزة الوطنية التونسية كونو تنقلاتها خارج العاصمة يحتمها ريبورتاج بو دقيقة في الأخبار و إلا ماتش كورة بدون حضور جمهور، كملت تعاملت مع الأحزاب بنفس الطريقة و الأسلوب : إلي يتبع البرامج السياسية في الوطنية 1 أو 2 يكتشف إلي ثمة غياب كلي للحياد و ثمة بعض الأحزاب يتعدوا على الصوابع واخذين أكبر مساحة مالبرمجة في وقت إلي أكثر من 70 حزب يتقاسموا في 25% من باقي البرمجة و عادةً ما تكون في شكل "أخبار سريعة" على الأحزاب إلي عملت ملتقيات. قلنا يمكن على خاطر التلفزة عندها أكثر من 20 سنة تواكب في أخبار الزعبع و ليلون و حزبهما فقط، ما زالت ما تنجمش تواكب أخبار بأكثر "تعددية" ؟ جينا نصقصيو طلعت "نقابة أعوان و موظفي التلفزة التونسية" بكلها متكونة من أفراد لهم توجه حزبي واحد فقط ماناش باش نذكرو اسمو على خاطر حزب "أفاق تونس" يرفض الدخول في ها النوع متاع التقطيع و التريش و الصراعات الحزبية "إلا إذا كانت للأحزاب برامج رسمية" (موش كلام الليل مدهون بالزبدة يطلع عليه النهار يولي معجون سفرجل) و عندنا ما اناقشو فيها و هذا شي موش متوفر مما يزيد يخلينا نستغربو من موقف التلفزة و اصرارها على التركيز على احزاب دون سواها تقولش عليها الأحزاب هاذي عندها برامج واضحة و لخرين لا.

صحيح إليوم حرية التعبير مكفولة أكثر بشوية من قبل (على خاطر كيف تصنصر صفحة فايسبوك أو انترنت هو إعتداء على حرية التعبير) لكن الصحافة متاعنا ما زالت تنقصها حاجة هامة اسمها الحياد إلي كان أكثر حاجة تنقصها في عهد زعبع. و بالصفة هاذي ولينا يا مزين مالبرة شنية أحوالك مالداخل! باش تتعلم التلفزة الوطنية اش معناها حياد الإعلام الرسمي نقولولهم يرجعوا للأرشيف في فرنسا في عهد سركوزي (لحكاية ما زالت فرشكة) مثلاً كيف قام نقاش كبير حول المساحة التلفزية المسموح بها لتغطية "الخطابات الرئاسية" (معناها حتى من الحكومة ما عندهاش الحق باش تلفزة حكومية باش تعدي أخبارها قد ما تحب). احنا إليوم مازل الشعب ما إختارش شكون يمثلوا و بدينا في إحتكار الإعلام فما بالك إذا صارت الانتخابات، يمكن حتى مالجرايد الحزبية تتمنع كان نكملو هكا ! لذا نطالبو الإعلام الرسمي باش يلتزم بالحياد و ما يتعاملش بأسلوب احزاب "فرض" و احزاب "سنة" لكن تولي احزاب تونسية و كفى (الله أعلم يمشيش الواحد منا يحل نهار "الرائد الرسمي للبلاد التونسية" يلقى فيه حوار حصري مع حزب من الأحزاب).

يحيا الإعلام المحايد و النزيه، تحيا حرية الصحافة، تحيا تونس

هز السيف و هيا قابلني

على سلامتكم،


من وقت إلي حكينا على الحرقة، كانت عندنا النية باش نحكيو على برشة مواضيع أخرى تهم التونسي بصفة عامة والشباب خصوصاً. الله غالب في وقت إلي الافكار قاعدة تتخمر في أمخاخنا، صارت حاجات في البلاد موش عارفين اش إنجموا نقولو عليها و إلا نحكيو ؟ في المتلوي، الهوتو و التوتسي ؟ لا لا ! البوسنة و الهرسك ؟ لا لا ! الثوار و كتائب القذافي ؟ تي ماهو قلنا لا ! ... توانسة إيه نعم توانسة قتلوا بعضهم ! توانسة تناحروا ! توانسة مثلوا بجثث بعضهم ! علاش يا مولانا ؟ ... مهما باش يتقال ما ثمة حتى شي يبرر القتل ! شكون بدا و شكون لحق، الكل غالطين و مذنبين ! "إذا إلتقى المسلمان بسيفيهما فالقاتل و المقتول في النار". كيف العادة و العوايد لعباد بدات تلوج في المذنبين و تحب تلبسهم تهمة المجزرة إلي صارت و نفس الأسامي رجعت للساحة، من غير ما نسميوها. المفيد عمرنا ما نحطو المواطن قدام مسؤليتو (خاصةً الاحزاب إلي خايفين لا يخربشو شعور الناخبين. بالطبيعة مدام يشوفوا في المواطنين مجرد أصوات إنبندرولها حتى لين نشدو الحكم) و نفيقوه على أغلاطو و عيوبو و عادت احزابنا إلى لغة "تونس بخير" لكن في صيغة أخرى.

إلي صار في المتلوي هو كارثة بأتم معنى الكلمة. إليوم قالو شدو جماعة متورطين في ها الجريمة و احنا نطالبو باش يتسلط عليهم عقاب يخليهم عبرة لغيرهم. ما نحكيوش على المحرضين برك، نحكيو زادة على إلي بربشوه شوية (أو برشة) مشا "تأبط شراً" و هبط ل"ساحة الوغى" يصول و يجول. يا أخي قتلك بوك، شدو و وصلوا لمركز الحرس أو الشرطة ... و ما تخافش ما عندو وين هارب، أما تاخو بثارك لا ماكانش باش تولي فوضى و قانون الغاب ! حاجة أخرى، لعباد إلي قعدت تتفرج من بعيد بإعتماد سياسة : "اش ما دخلني ؟" تتحمل جزء من المسؤلية. على خاطر كان كل واحد اتدخل بالحسنى و حاول يكون واسطة خير، رانا ما وصلناش نحكيو على الموضوع من اصلو.

ختام الحديث، ربي يهدي من خلق و يحسن العاقبة.

تحيا تونس