jeudi 28 juillet 2011

كرامة إنسانية

السلام عليكم،

سيدي رمضان فاحت ريحتو في بلادنا، الحوانت حضرت روحها، العباد تعول، ثمة شكون يحضر في روحو باش يمشي في عمرة في ها الشهر الفضيل (انشالله يمشيو و يجيو بالسلامة و ربي يتقبل منا و منهم صالح الأعمال)، حتى من الصغيرات إلي ما يقدروش على الصيام يتبادلوا في الخبرات في مجال "تخييط أيامات الصيام" و هالجو ما يتشراش بالفلوس. لكن من أهم ما يميز شهر رمضان (انشالله مبروك علينا و عليكم و تصوموه بصحة البدن) هو عادات مزيانة و إنسانية و دينية تبين قداش التونسي قلبوا كبير ؛ إي نعم في سيدي رمضان التوانسة يتفكروا الناس إلي ضوروفهم صعيبة و ثمة إلي يعطي فلوس و إلي يهز قضية و إلي يطيب و يوكل. حلول اختارها التونسي في إطار وعي بمشاكل غيروا و عدم إختيار العيش بأنانية لكن تبقى حلول وقتية ما تكفيش باش نوصلو نقضيو على الفقر بصفة كلية أو على القليلة نخفف منو.

الفرق بين الحزب و الجمعية الخيرية و إلا التحرك الشعبي هو كون الحزب يحاول يفكر في حلول على المدى القصير، المتوسط و الطويل للمشاكل. كيف نقولو حلول موش معناها نهزو كميون بالمواد الغذائية إلي وفات صلوحيتها و إلا نعملوا موائد افطار كيف ما كان يعمل التجربع في وقت زعبع باش يعملوا شوية تصاور من بعد يخدموا بيهم في حملتهم الدعائية. السبب الأول إلي يخلينا نرفض الحلول من هالنوع هو كونو هذا يتسمى اشتراء لأصوات الناخبين، ثانياً لأنو حل من نوع "الليقة تجيب" بلغة أخرى ما ثماش برنامج إجتماعي و إقتصادي واضح يخلينا نتعاملو بأكثر حنكة مع المشكل هذا و بالتالي نوليو نوهمو في المواطنين اللي حل مشكلهم يتلخص في زوز كيلو سميد أحرش و بيدون زيت حاكم بو 5 لترات في شهر الصيام. في كلمتين إفلاس سياسي من حيث البرامج و رشوة تتقدم للناخبين اللي يتم إستغلال ضوروفهم المادية.

حزب "أفاق تونس" خمم في مشكل الفقر في تونس و لقى اللي موش وجبة باش تحلها و لا محفظة معبية بالكتب باش تخلي العائلات الفقيرة تحس أقل بالفقر. حزب "أفاق تونس" فكر في حلول على قاعدة صحيحة و على طوال. أول حاجة بالنسبة لينا باش نحلو مشكل العائلات المحتاجة هو حماية و تدعيم مواطن الشغل "لا تعطيني سمكةً بل علمني كيف اصطادها" و بالطبيعة ما يكونش بحيث يولي المشغل محلول في العريض و يولي إستعباد كيف اللي نشوفو فيه في برشة مؤسسات (تشغيل أطفال، تغطية إجتماعية غير متوفرة، ...). ثانياً تدعيم التغطية الإجتماعية و الخدمات الصحية اللي لازم تتوفر فيها الجودة و بالطبيعة موش 10 مستشفيات في منطقة و 10 مناطق ما فيهمش حتى مجرد مستوصف باش يزرقو فيه. أصحاب الإحتياجات الخصوصية لازم ناخذوهم بعين الإعتبار و يكون ثمة برامج خاصة تتلها بيهم. ما يلزمش ننساو اللي التعليم و التكوين يمثلوا باب يحل بيبان الرزق (جدودنا كانوا يقولو "يوفى مال الجدين و تبقى صنعت اليدين") و هذاكة علاش لازم نوفرو تكوين و تعليم عندو جودة عالية في كل المناطق و يلزم يكون مناسب لسوق الشغل و حتى اللي "فاتو الترينو" لازم تتوفرلو فرصة جديدة باش ينجم يتكون. أهم حاجة لازم نركزو عليها كيف نحكيو على الشهايد و التكوين و التشغيل، هي "الإستحقاق" معناها اللي يشد خدمة يكون بجدارة موش بالمعارف و الأكتاف و نلقاو شكون بوه دبرلو خدمة ينطر منها مصروف خرجاتو و سهرياتو في وقت اللي ثمة شكون أحق و أكثر منو كفاءة قاعد بطال في وقت اللي موطن شغل يخليه ينتقل من مجرد مواطن إلى مواطن يعيش بكرامة من غير ما يقعد يستنى شكون باش يجي يحن عليه من عام لعام. في البرنامج المفصل متاع حزب "أفاق تونس" اللي قريب يتم الإعلان عليه باش نوضحو الوسائل اللي باش نحققو بها الأهداف هاذي.

هذا ما يمنعش اللي احنا نشجعو كل مبادرة متاع مواطنين أو جمعيات يقدموا مساعدات إنسانية "لله في سبيل الله" خاطر هذاكة اللي يخلينا نحسو ببعضنا و نفكرو في المصلحة متاع المجموعة بعيد على الحسابات الشخصية الضيقة و الأنانية. التونسي ضهر للعالم أجمع اللي هو مثال في التكافل الإجتماعي (مثلاً في التعامل مع أزمة اللاجئين من ليبيا) و نحبوه يقعد ديمة مثال يحتذى بيه. و قبل ما نختمو نتمناو للشعب التونسي رمضان مبارك ( إلا أخطانا من مبارك و الزين ما صدقنا ارتحنا منهم)، رمضان كريم و كل عام و انتوما بألف خير.

تحيا تونس

6 commentaires:

  1. Sympatique je le publie :))

    RépondreSupprimer
  2. 3lech mathammach page afek pour sidi bouzid ?!!

    RépondreSupprimer
  3. Amazigh tunisien28 juillet 2011 à 09:59

    cv article béhi

    RépondreSupprimer
  4. Ce que vous proposez est logique et pourrait être bénéfique pour la nation de tout point de vue.J'espère que votre programme soit exécuté(le plus tôt possible).Bon courage & bonne continuation(de la part d'un vieux tunisien)

    RépondreSupprimer
  5. لاحظت راوْ عندكم مشكلة فالكتيبة بالعربي جماعة أفاق، سواء عالمدوّنة ولاّ حتّى في بياناتكم الرّسميّة

    حاولوا تصلّحوا أكثر، ولاّ شوفوا شكون يصلّحلكم قبل ما تنشروا حكاية(هانها النّهضة توّ تجيبلكم أستاذ عربيّة يعمللكم دروس ببلاش هاع هاع هاع)

    على خاطر شيّ يوجع العين(و القلب) كي نشوف أخطاء فالاملاء(و ساعات التّركيب ...الخ) يمكن الاستغناء عنها بكلّ بساطة

    مثال : "صنعت اليدين"، علاش آكل "ت" مفتوحة؟ راهي تجهر عين الرّائي دوب ما يشوفها و يمكن يفدّ و ما يكمّلش يقرأ

    RépondreSupprimer
  6. سي يوسف النهضت صاحبت فتحت التاء المفتوحت هي إلي بش تعلم آفاق العربية هعهعهعهعهع هذي هي أن جربوع إذاً أنا أتجربع

    RépondreSupprimer